Аизараҟны иалацәажәон Дәрыԥшь ақыҭа иҟалаз адгьылҳәазара иахҟьаны ӡыда иаанхаз быжьқыҭак рҭагылазаашьа. 

Иҟалаз ахҭыс аԥхасҭа анаҭеит 5000 м. аӡымҩангагатә ҭыԥ, уи иахҟьаны быжьқыҭак ӡыда иаанхеит. 

Аҳәынҭқарра Ахада аҭакԥхықәра здыз аусбарҭақәа авба риҭеит иахьатәи амш иалагӡаны аусурақәа иахьрыламгаз. 

Ахада иазгәеиҭеит иаарццакны аус аҭыԥ ишықәҵатәу, уаха иахәҭоу атехника аҭыԥ ахь инаргарц, даҽа мышкы уи иақәыдмырӡырц, уаҵәы ашьыжь инаркны аусурақәа нап адыркырц. 

Акапиталтә ргылара Аусбарҭа аиҳабы Демир Гамисониа иҳәеит, зегь раԥхьа иргыланы 300 м. амҩа шрыцқьатәу, анаҩс ауп ааха зауз аӡымҩангагатә ҭыԥ аиҭашьақәыргылара аналыршахо. 

Иазгәаҭан аамҭала апластикатә трубақәа шьақәдыргыларц, анаҩс урҭ ԥсаххар шалшо аихатәқәа рыла. Уи аамҭа кьаҿк иалагӡаны анхарҭатә ҭыԥқәа ӡыла реиқәыршәара аус иацхраауеит. 

Аҳәынҭқарра Ахада аҭакԥхықәра зду аусбарҭақәа зегьы адҵа риҭеит иахәҭоу ауснагӡатәқәа зегьы азгәаҭаны иаарласны ақыҭауаа ӡыла еиқәдыршәарц.