Бадра Гәынба Дмитри Медведев иҭабуп ҳәа иеиҳәеит, 2008 ш. нанҳәамза 26 рзы Аԥсны Аҳәынҭқарра ахьыԥшымра азхаҵаразы Урыстәылатәи Афедерациа иҟанаҵаз аӡбамҭазы.
Аԥсны Ахада Бадра Гәынба иазгеиҭеит, ари ашьаҿа Аԥсны аҭоурых аҟны наунагӡа хашҭра ақәымкәа ишаанхо, аԥсуа жәлар ҳатырқәҵара дула ишазнеиуа ас еиԥш иҟоу аҭоурыхтә хҭыс. Урыстәылатәи анапхгара ирыдыркылаз аӡбамҭа ҳажәлар шәышықәсала иззыҳәоз шакәыз - жәларбжьаратәи аилазаара иазханаҵаз, зых иақәиҭу, ихьыԥшым аҳәынҭқарраҟны анхара.
Аицәажәара аҳәаақәа ирҭагӡаны аганқәа азааҭгылеит аурыс-аԥсуа жәлар реизыҟазаашьақәа рыҿиара, реиҩызареи русеицзуреи рымҽхак аизырҳара, Урыстәылеи Аԥсынтәылеи ажәларқәа ирыбжьоу аимадарақәа рырҭбаара.