Раԥхьа иргыланы,

сгәаанагара сҳәарц исҭахуп Қырҭтәылеи ҳареи ҳаизыҟазаашьақәа рышьақәыргылара алшоит ахьиҳәо адепутат Кан Кәарҷиа иқәгылара ахәҭазы.

Сара сзы иџьашьахәуп Аԥсны Аџьынџьтәылатә еибашьра аветеран иҟнытә исаҳаз ас еиԥш иҟоу аҳәамҭа. Схаҿы исзаагом аҭынчратә еиқәшаҳаҭра знапы аҵазмҩыц, ареваншисттә планқәа мап рцәызымкыц, жәларбжьаратәи аиԥыларақәа рыҟны Аԥсны Аҳәынҭқарра инамаданы изаҟаразаалак хра злоу аӡбамҭақәа раанкылара зҽазызшәо атәылеи ҳареи ҳабжьара еизыҟазаашьақәак рышьақәыргылара алшоит ҳәа ацәажәарақәа.

 Аҭынчреи ахьыԥшымреи рыхәԥса мыцхәы ибзианы иаҳгәалашәоит. Уи иахҭнаҳҵеит иҳавагылаз ҳҩызцәа рыԥсҭазаарақәа, уи ахә ашәара ҳақәшәеи анацәа рылаӷырӡқәа рыла, зықьҩыла зразҟы ҿахҵәаз Аԥсны аҵеицәа рыла.  Убри аҟнытә иахьатәи Қырҭтәыла ламысцқьала, зинеиҟарала аиҿцәажәара иазхиоу ҳәынҭқаррак аҳасабала ахцәажәара, иааркьаҿны иуҳәозар, аилкаара уадаҩуп.

Аҭынчра аӡәгьы даҿагылаӡом. Аха аҭынчра ашьақәыргылара алшоит иҟоу аҵабырг азхаҵара, Аԥсны жәлар иҟарҵаз алхра ҳаҭырла азнеира аныҟала. Макьана уи ыҟаӡам, Қырҭтәылеи ҳареи ҳаизыҟазаашьақәа рышьақәыргыларазы иарбанзаалак ацәажәарақәа политикатә гәызианроуп, мамзаргьы ашәарҭара зцу ҭакԥхықәрадароуп.

Аԥсны-урыстәылатәи аизыҟазаашьақәа ртәы ҳҳәозар, Урыстәыла стратегиатә дгылаҩны иҟоуп, иаахтны исҳәоит, иара заҵәык ауп Аԥсны Аҳәынҭқарра адгылаҩыс иҟоугьы. Сара агәра

ганы сыҟоуп Аԥсни Урыстәылеи рыбжьара аидгыларатә еизыҟазаашьақәа ирԥырхагаша иарбан ҳәамҭазаалак, ма усзаалак ҟалашьа амам ҳәа, уи ҳтәыла амилаҭтә интересқәа ирықәшәом ҳәа.