Ауснагӡатә еиҿкаауп Икоммерциатәым Автономтә Еиҿкаара "Аԥсны акомандеи" Апродиуссертә центр "Интеграциеи " рыбзоурала, Аԥсны Аҳәынҭқарра Ахада Иусбарҭеи " Урыстәыла -аҭагылазаашьақәа раԥҵареи" иҟарҵаз ацхырааралеи. Ас еиԥш зымҽхак  ҭбаау акаҳуатә ныҳәа ҳтәылаҟны иазгәарҭеит раԥхьаӡа акәны. Зықьҩык инарзынаԥшуа асасцәа аҭааит, аҭыԥ еиднакылеит Аԥсны араионқәа зегьы рхаҭарнакцәа, иара убас акаҳуа аганахь ала жәаҩыла аҟазацәа. 

Аныҳәатә программа рхы аладырхәит Аԥсны Аҳәынҭқарра аҟны иҟоу Урыстәылатәи Афедерациа Ацҳаражәҳәаҩ Виачеслав Гладков, иара убас Венесуелеи Никарагәуеи рыцҳаражәҳәаҩцәа.

Венесуелеи Никарагәуеи рышьхаҳаракырақәа ррегионқәа рҟынтә иаагаз акаҳуа аексклиузивтә гьамақәа ргәаҭара мҩаԥысит. 

Жәларбжьаратәи акаҳуатә ныҳәа мҩаԥысит Аԥсны Аҳәынҭқарра ахьыԥшымра азхаҵара инамаданы, иара хырхарҭас иамоуп ҳкультуратә еимадарақәа рырҿиара, ҳаиҩызаратә еизыҟазаашьақәа реихаҳара, атәылақәа рыҩныҵҟа апрофессионалтә ԥышәа аимдара.