Гәынба Бадра иаҵшьны иҳәеит аделегациа аара аҵак ду шамоу, ҩ-ганктәи аусеицура алҵшәа бзиақәа шамоу, аԥхьаҟатәи аусеицуразы алшара ҿыцқәа шаанартуа.

Аҳәынҭқарра Ахада инаҵшьны иазгәеиҭеит атәылақәа раԥхьатәи рԥызацәа - Владислав Арӡынбеи Мурҭаз Рахимови реиҩызареи русеицуреи ҩ-ганктәи аизыҟазаашьақәа уасхырс ишроуыз. Ахада иҳәеит ишьҭаҵаз аҭоурыхтә уасхыр иабзоурагны иахьа атәылақәа ирыбжьоу аимадара аӷәӷәахара ишаҿу, иазгәеиҭеит Башкорҭосҭан уажәтәи анапхгара ҩ-ганктәи аимадарақәа ҳаҭыр ақәҵаны ишеиқәдырхаз.

Аҳәынҭқарра Ахда иҭабуп ахиҳәааит Аҟәа амшын аԥшаҳәаҟны имҩаԥысуа аиҭашьақәыргыларатә усурақәа, ари ҭоурыхтә хҭысны ишыҟалаз. Бадра Гынба иҳәеит Аԥсны атәылауааи асасцәеи акыраамҭа ишыргәалашәало ҳаиашьаратә еизыҟазаашьақәа шаҳаҭра рзызуа ари аӡбамҭа.  

▫️ Аусеицура азҵаара дазхьаԥшуа, Ахада иаликааит арҿиаратә коллективқәа реимадара. Аҳәынҭқарра Ахада иазгәеиҭеит акультурақәа реигәныҩра ҳаимадара есааира ишарӷәӷәо, аԥхьаҟатәи ҳаизыҟазаашьақәа рырҿиара ишацхраауа.

Башкорҭосҭан Ареспублика Ахада Ради Хабиров Ахада иҭабуп ҳәа иеиҳәеит аԥхарра зҵаз аиԥыларазы. Уи иажәақәа рыла, Аԥсныҟа раара ҳажәларқәа гәыкала реиҩызара арӷәӷәара ишашьҭоу атәы шьышьақәнарӷәӷәо , азеиԥш проектқәа ракәзар, еиуеиԥшым ахырхарҭақәа рыла аусеицуразы уасхыр бзианы ишыҟало.

Ради Хабиров иаҵшьны иҳәеит аҩ-уснагӡатә хаданы рҿаԥхьа ишықәгылоу  аекономикатә ҿиара алыршареи ажәларқәа реизааигәахаразы аҭагылазаашьақәа раԥҵара. Ҷыдала иазгәеиҭеит атәылауаа реиҭанеиааиразы алшара ҿыцқәа аазыртыз Уфа-Аҟәа ишиашоу ибжьоу аҳаиртә реис қәҿиарала аусура.

Аиԥылара аҳәаақәа ирҭагӡаны ирылацәажәан атауареикәыршара арҭбаара иадҳәалаз азҵаатәқәа. Ради Хабиров иазгәеиҭеит наҟ-ааҟтәи атауареикәыршара амҽхак ахьынӡаҭбаау, ишьақәирӷәӷәеит Башкорҭосҭан шазхиоу раалыҵ Аԥсныҟа аашьҭра, иара убас Аԥснытәи ақыҭанхамҩатә аалыҵ аахәаара.

Ради  Хабиров ахә ҳаракны ишьеит Аҟәа амшын аԥшаҳәа аиҭашьақәыргыларатә усурақәа, ас еиԥш иҟоу апроект ҩжәларык реиҩызара символра азызуа проектны ишыҟоу.

Аԥсны Аҳәынҭқарреи Башкортостантәи Ареспубликеи реиҩызареи русеицзуреи рырӷәӷәара аусхк аҟны илагала ду азы, Аԥсны асоциал-економикатә ҿиара адгылара аҭареи рзы, Аԥсны Ахада Гәынба Бадра Башкорҭосҭан Ареспублика Ахада Ради Хабиров ианеишьеит «Ахьӡ-аԥша» аорден II аҩаӡара.

Гәынба Бадра иазгәеиҭет Башкорҭосҭан Аԥсны аганахь ала иҟанаҵо адгылара ахә ҳаракны ишишьо, иазгәеиҭеит иара убас ареспублика адгылара азҭо зегьы аҳәынҭқарратә ҩаӡара аҟынӡа русура ахә ашьара ишаԥсоу.

Ҷыдала, Аԥсни Башкорҭосҭан Ареспубликеи ирыбжьоу аиҩызара арӷәӷәара аус азы, Башкортостан Ареспублика Ахада Ради Хабиров Иусԥҟала аԥсны Аҳәынҭқарра Ахада Бадра Гәынба иаашьан Ажәларқәа Реиҩызара аорден.