Гәынба Бадра инаҵшьны иазгәеиҭеит аарыхреи агроааглыхратә комплекси рыҿиара Аԥсназы акрызҵазкуа хырхарҭаны ишыҟоу. Убри инамаданы ареспублика Ленинградтәи аобласт аԥышәа ишазҿлымҳау. Аҳәынҭқарра Ахада иажәақәа рыла, шьҭа апрактикатә ԥышәеимдарахь аиасреи иалкаау ашьаҿақәа рынагӡареи аҵак ду шамоу.
Гәынба Бадра иазгәеиҭеит аганқәа наҟ-ааҟ системала аусеицура хықәкыс ишрымоу, инаҵшьны иазгәеиҭеит Аԥсны Ленинградтәи аобласт аԥышәа ахархәара ишазыхиоу ҳаамҭазтәи атехнологиақәа агроааглыхратә комплекс ралагалареи изыцҵоу ашәахтәқәҵаратә база аԥҵареи ртәы.
Атәыла ахада иазгәеиҭеит ҩ-ганктәи аусеицура активла аҿиара ишалагаз агубернатор хаҭалатәи илагала иабзоураны.
Аиҩызаратә еизыҟазаашьақәа рыҿиаразы Гәынба Бадра ҿырԥштәыс иааигеит иҳаҩсыз ашықәс азы иеиҿкааз аԥснытәи ахәыҷқәа Ленинградтәи аобласт аҿы рыԥсшьара. Аҳәынҭқарра Ахада иҳәеит абиԥарақәа реимадара шаҳаҭра шауа аганқәа аԥхьаҟа системала аусеицура ашьақәыргылара ишазхиоу атәы.
Ахада ҷыдала иҭабуп ҳәа иеиҳәеит Александр Дрозденко аҭоурыхтә гәалашәара аиқәырхареи ааигәа Аџьынџьтәылатә еибашьра ду аан азеиԥш хақәиҭразы ақәԥара иалахәыз Аԥсны иалҵыз аибашьҩы Хьымца Ҭарба ибаҟа аартреи рзы.
Гәынба Бадра инаҵшьны иазгәеиҭеит аҭоурых аиҷаҳара ԥхьаҟатәи абиԥарақәа рыхьӡала аҿиара инамаданы ауаажәларра реидгыларазы акрызҵазкуа дырганы ишыҟоу.
Александр Дрозденко иҳәеитт Аиқәшаҳаҭра анагӡаразы амҩатә хсаала азырхиара ишалаго азы, иагьазгәеиҭеит аԥснытәи рколлегацәеи дареи русцеицура иааиԥмырҟьаӡакәа ишымҩаԥысуа атәы.
Агубернатор ҷыдала хшыҩзышьҭра аиҭеит аиашьаратә еимадарақәа рыҿиара. Аӡбахә иҳәеит Приозиортәии Тҟәарчалтәии араионқәа, иара убас ақалақьқәа Сосновыи Бори Афон ҿыци рыбжьара аиашьаратә еимадарақәа рышьақәыргылара атәы.
Александр Дрозденко инаҵшьны иазгәеиҭеит мҽхакы ҭбаала аусеицура ацҵара дшазхиоу, ажәалагала ҟаиҵеит ааглыхратә инвестициақәеи, абаӷәазатә инфраструктуреи, агроааглыхратә комплекси напхгарарыҭареи рҿы аобласт аԥышәеи ареспублика алшарақәеи реимадаразы. Ҷыдала, иалацәажәеит Ленинградтәи аобласт аԥхьагылара ахьамоу аԥсаатәааӡареи ахш зымҵуа арахәааӡареи рыҿиараҿы аԥснытәи аспециалистцәа ацхыраара рыҭара атәы.